Tommaso Campanella, De sensu rerum, p. 23
colliguntur, divisionemque vitant; ita totum mundum horrere
divisionem,
quae advenit illi, cum inter corpora partialia inane intercidit,
et quidem nisi
timore aut dolore quopiam aër afficeretur, cum
deficit sibi alterius corporis
contactus a vacuo, non tam celer succurreret
toti, aliorumque corporum expeteret
contactum. Animal mundus
videtur Eusebio , et Greg. Nysseno , et aliis patribus et
Platonicis
Philosophis , sed universale particularium domicilium, ut corpus
nostrum
vermium et pediculorum. Non indiget pedibus, quoniam super
alio non
incedit, sed in se rotatur, ut Echinus Marinus. Nec oculis et
auribus, quoniam extra
se non habet quae videat, audiatque. Nisi sint
alia systemata extrinsecus. At intra
se omniscium suarum partium est.
Memento etiam quod non omnia animalia habent organa
omnia,
nec eadem. Inspice usum, et erudieris supra vulgus.
Caput
X.
Dari vacuum violenter, non naturaliter, et
sensum
rerum comprobari contra Arist.
utriunque.
~ Opinantur Peripatetici nec
naturaliter nec violenter posse
inane reperiri, quoniam adducta exempla docent,
Entia
omne malum sustinere magis quam inane: Attamen nolunt
sensum consensumque
rebus tribuere. Irridentque
Platonem aliosque mundum animal
appellantes. Reddentes autem
rationem, quare non datur inane, dicunt, quod si
daretur, gravis absurditas
eveniret, videlicet quod fieret motus in instanti absque
tempore,
quoniam simul lapis cadens de tecto in pavimentum domus reperiretur
in
suo fine. Id declarant, quoniam mobile tardius movetur
intra corpus crassum, quam
intra tenue: velocius enim fertur intra
aquam, quam intra mel, et velocius intra
aërem, quam intra aquam;
ergo si vacuum esset, nullo resistente corpore medio, ac
largiente tempus
motui,moveretur subito, quod est contra definitionem motus.
Sed
haec ratio non est Philosopho digna, cum quia non respondet ad odium
vacui,
et amorem pleni, quae requirere sensum apparent; Tum quia
ratio a quaestione distat
valde, veluti si quis interrogatus, quare manducat,
responderet, quia nisi
manducaret, perderentur dapes: tum
quia fallacissima est, ut ostendit Avenpaces et D.Thom. Non modo
enim dat motui tempus resistentia medij, sed et finitudo mobilis,
quod
finiti cum sit vigoris in tempore proprium edit actum. Similiter et